福建土樓, 因其悠久的歷史, 奇特的風格, 精巧的結構, 宏大的規模而被譽為世界民居建築的奇觀.
土樓如今聲名遠播, 其實是要多謝美國中央情報局. 美國從衛星上拍攝到閩西附近有很多類似核子反應爐的建築物, 即時引起一陣恐慌, 於是不斷地進行探測研究, 僅僅是衛星照片就拍了上萬張. 後來美國情報局有關人員以遊客身份前來旅遊, 才恍然大悟, 他們所担心的核子反應爐, 其實就是民居土樓! 之後便吸引了很多海外遊客前來參觀遊覽.
福建土樓總數達萬座以上, 其中在福建西南部永定縣, 南靖縣, 華安縣等地區尤其集中, 有三千多座. 而我們今次的旅程, 主要在永定和南靖兩個地方.
亮亮一早已經打電話預約左o係永定嘅住宿同埋交通. 我地會住當地土樓"福裕樓", 而樓主林先生亦提供包車及導遊服務. 我地book左一晚住宿及兩日包車導遊服務.
當日一早七點已經到達永定, 樓主林先生準時o係火車站外接我地. 食過早餐, 買埋回程車票, 我地四個坐上林先生嘅小型van仔出發去第一站~~~初溪土樓.
呢一架就係林先生嘅車嘞，都唔錯ka!
由永定火車站到初溪景區大約要個半鐘, 不過林先生係一個安全駕駛者, 經常停車傾電話, 所以車程耐左. 途中有一片片金黃色嘅梯田, 真係喜出望外.
到達初溪景區, 首先放下$50入場費. 我地先到山上嘅觀景台睇睇初溪土樓群嘅全景(第一張相), 然後才入村參觀.
土樓從裡面睇其實似以前o個d舊式井型公屋咁,中間有個天井位, 而四面就由好多房間包圍.
土樓地下o個層係廚房, 飼養牲畜嘅地方, 而二樓就儲存物件, 三樓、四樓先住人.
雖然村裡面嘅成年人多數都出左市區返工, 但係唔知點解村內都有幾多小朋友, 而且佢地都好純樸可愛.
呢度叫集慶樓, 有578年歷史, 已改變為客家土樓文化博物館, 所以keep得好新好乾淨.
比較大型嘅土樓裡面都會再建一圈又一圈嘅房子, 而中間嘅房子就係共用嘅地方, 可用作議事堂.
土樓有方型, 圓型及五鳳型. 先有方型, 之後再改良成圓型. 導遊話因為方型嘅土樓角落位置嘅房間會長期無陽光照射, 改良成圓型之後日出日落所有房都可以晒到陽光. 以前d人真係聰明呀!
呢d叫玫瑰球 (台灣叫絡神花), 周圍路邊都見種滿呢d花, 晒乾可以沖茶.
之後我地就過去中川古村落, 門票$30. 其實呢條村真係唔算特色, 古街仲有好多垃圾, 連林先生都話佢地d村民唔識得好好保護自己嘅家園.
我覺得有d似去左日本, 其實呢度叫胡氏家廟.
呢d紀念碑有分石獅子頂同埋筆尖頂, 石獅子代表武士, 筆尖代表文人.
遊覽完中川古村落已經日落, 林先生帶我地返去佢嘅屋企~福裕樓.
福裕樓係一座方型土樓, 由三兄弟瓜分, 右邊嘅房間全部都係比遊客用. 我地入住當日就有三家法國人全o係裡面.
我地住三樓嘅房間, 客房都乾淨, 仲有電視tim! 而我同CC間房有三張床(一張係雙人床), 早知就唔駛book兩間房啦! 不過一間房都係$50, 唔緊要啦!
房間內無廁所, 地下有兩個公眾浴室, 最開心係有源源不絕熱水供應!
至於廁所, 就o係土樓出面嘅小屋仔, 都乾淨企理. 不過樓主話土樓出去廁所度門晚上十一點就會閂, 過時就要自己開門出去. 如果夜晚想去廁所又唔想落樓, 每個房門口外都有個小小嘅紅色膠筒, 可以隨便使用. 即時反應係一定要十萬個小心, 千其唔好踢倒o個d紅色膠筒!~~~待續!
